Saraakiil ka socda Midawga Afrika oo booqasho ku jooga magaalada Muqdisho.

 AXAD,Jan,14,2007 Muqdisho,Somaliya

Magaalada Muqdisho ayaa waxa booqasho ku yimid saraakiil ka socota midawga Afrika oo ah kuwii ugu tiro badnaa oo abid yimaada gudaha dalka Soomaaliya.

Saraakiisani ayaa waxa wada hogaaminaya Brima Mati Makula oo u dhashay wadanka Koonfur Afrika iyo Dr, Kaguuza oo isna u dhashay wadanka Kenya.

Saraakiishaasi ayaa waxaa lagu sheegay in ay tahay ujeedada socdaalkooda sidii loo samhin lahaa meelaha ay dagayaan ciidamada ka socda midawga Afrika ee dhowan soo gaaraya dalka Soomaaliya.

Waxa ay kulamo la qaateen madax ka tirsan saraakiisha ciidamada dawladda Soomaaliya, iyada oo kala hadlay arrimo kala duwan oo ay ugu muhiimsan tahay sidii ay ciidamada Afrikanka ah u imaan lahaayeen gudaha dalka Soomaaliya.

Afhayeenka dawlada Soomaaliya C/raxmaan Maxamed Nuur (Diinaari) ayaa waxa uu shaaca ka qaaday in saraakiishaasi ay yihiin kuwo sahan ah oo doonaya in ay sahmiyaan goobihii ay xarumaha ka dhigan lahaayeen ciidamada Afrika ee nabad ilaalinta ah, ayna kormeero ku sameeyeen qaar ka mid ah xeryaha ciidamada.

Waa markii ugu horay oo saraakiil caynkani oo kale ah ay soo gaaraan gudaha dalka Soomaaliya, waxaana la qorshaynahaa in dhowaan dalka ay soo galaan ciidamo ay diyaarisay midawga Afrika.

Cabdalla maxamed cabdille.

Cabdalla45@hotmail.com