Arbaco,Jan,3,2006 

Taarikh: 2/01/2007

Hordhac

Ugu horreyn, waxaan ka mahadcelineynaa qaabiladda Ra’iisul Wasaaraha Dowladda KMG Prof. Cali Maxamed Gedi u fidiyay Beesha Cayr oo ka dhacday Magaalada Muqdishu, maanta oo taarikhdu tahay 02/01/2007.

Kaddib markii Ciidammada Ethiopia soo galeen Magaalada Muqdisho, Beesha Cayr waxay u howlgashay adkeynta nabadgelyada iyo xasillonida Magaalada Muqdisho, waxayna qaaday tallaaboyin looga hortagayo isku dhac shacbiga soomaaliyeed dhexdiisa iyo isku dhac ciidammada Ethiopia iyo shacbiga ku nool Magaalada, taaso noqotay miro dhal ilaa hadda. Haddaba, waxaan soo jeedineynaa talooyinka soo socda si nabadda iyo xasillonida jirta u waarto.

Maslaxadda Beesha Cayr waxay ku dhex jirta maslaxadda Caamka ee dalka iyo dadka. Sidaa darted, waxaan rajeyneynaa in talooyinka hoos ku qoran deg deg wax looga qabto si loo helo kalsoonida Shacbiga soomaaliyed

Talooyin

Ayadoo laga faa’ideysanayo fursadda la soo gudboonatay dalka, waxaan soo jeedineyna qodobbada soo socda:
1. In la abaabulo wada hadal siyaasadeed ee loo dhan yahay (inclusive dialogue) ee dhexmara Ummadda soomaaliyeed, sababha soo socda dartood:

a) Labadii sano iyo bar ay jirtay Dowladda KMG ee Soomaliya waxaa dhexdeeda ka taagnaa khilaaf qoto dheer oo howlaheedii curyaamiyay..

b) Waxaa lagu tuntay Axdigii KMG ee lagu guddoonsaday Shirkii Dib U heshiisinta Soomaliyeed Nairobi, Kenya

c) Waxaa lagu xadgudbay habkii awood qaybsiga, cadaaladda iyo kala qaybinta awoodaha dowladda ee ku qeexan Axdiga KMG..

d) Ayadoo dowladda kala qaybsan tahay, ayaa dalka soo galeen Ciidammada Ethiopia.
e) Waxaa dhacay ama weli socda maamulxumo iyo dhaqammo ka soo horjeeda nidaamka dowliga ah.

f) Kaalmada caalamiga iyo la shaqeynta dowladda waxay ku xiran tahay heshiis lagu gaaro wada hadal siyaasadeed sida ku cad Go’aanka Golaha Ammaanka ee Qarammada Midoobay iyo warka cad ee ka soo baxay Wasaaradda Arrimaha ee Dowladda Mareykanka 29 Desember 2006.

2. In dib la isugu yeero Barlamaanka Federaalka Soomaliyeed si buuxdana u shaqeeyo si loo xajiiyo inuu matalo danta iyo maslaxadda Ummadda Soomaliyeed.

3. In dowladdu Federaalka Soomaliya soo bandhigto barnaamijka ay dooneyso inay uga faa’ideysato Ciidammada Ethiopia ee dalka soo yimid ee waxtar u noqon kara bulshada soomaaliyeed. Isla markaana la qeexo xiriirka sharciyadeed ee u dhexeynaya Ciidammada Ethiopia, Dowladda Federaalka Soomaliyeed iyo Shacbiga Soomaliyeed.

4. In laga digtoonaado ka hadal xaalad amar deg deg ah taasoo ka soo horjeeda Axdiga KMG iyo dib u heshiisinta. Sheegashada awoodaha amarka deg deg ah waxay soo dedejinaysa xasilloni darro iyo qalalaase hor leh.

5. In la dhiso ciidammo Federal ah oo dhab ah lana dhowro habka Gobollada ee dhismaha Ciidammada ee ku qeexan Axdiga KMG. Waa in si deg deg ah loo ababuulo ciidammadii qalabka sida ee soomaliyeed si ay Ciiidammada Ethiopia ugala wareegaran xilka.
6. In dowladdu aysan marna isku dayin inay dadka ku kashabto bixinta lacag inta hay’adaha sharciga ah iyo shuruucda lagu maamulayo la dhammeystirayo.

7. In hub ururinta loo maro habka ku tilmaaman Axdiga KMG.

8. In laga qaado xannibaada dhaqdhaqaaqa ganacsiga iyo dhaqaalaha dalka si bulshada dagaalada iyo colaadaha ay dilootay u kasbadaan nolol maalmeedkooda.