Isniin,Feb,12,2007 www.Hobyoradio.com

Gabaygan wuxuu ku saabsan yahay dowladda Tigreega ee ku soo duushay dhulka Soomaaliyeed iyo kuwa qiilka u yeelaya oo baneynaya in cadowgii gaamuray dabbaabaad iyo ciidan lixaad leh dalka ku soo geli karo, dadka leyn karo waxna aan leyska weydiinin dabadeedna lagu sifeyn karo waa saaxiib iyo daris labadaba. Nuxurkiisu waa in aanan arintaas la qaadan karin inta dhiig Soomaali jiro, cadawga xoog kugu qabsadaana uunan mudneyn in ubax loo dhigo ee ay tahay in la mariyo waajibkiisa. Wuxuu tilmaamayaa in aan la quudareyn karin nolol gunimo, in hogaanka Ethiopia ku jiro gacan aan mudneyn  iyo in Soomaaliya hesho hogaan nadiif ah. 

Waxaa tiriyey Axmed Cawaale. February 2007 a_awale@hotmail.com

1.Nimanka Tigrey ka yimid iyo kuwa u nacamleeya

2.Kuwa daba nashleyn ee niggaxa u sii qaada

3.Nasabka iyo diintaba nimanka shilinka dhaafsaday

4.Naanaabka wasiir-moodka iyo kuwa beenta soo niiba

5.Nac allay muteen giddigood wixii maray jid naareedka

6.Ka noqdaan ku iri dhulkaan nooma dhexooyo’e

7.Ma nagaan kartaan baan ku iri adinkoo hub la naashoone

8.Waase igu naceen gartaydii nifaaq la’aaneede

9.Waadinkaa Colaad naadiyee waa keenii nolosha qoonsada

10.Mar haday naftu bixi oon cidi noolaaneynin

11.Lama naawilo nolol xumi waa naar aduunyaade

12.Naxariista eebbaa tartan mudan iyo nuurka aakhiro’e

13.Nasiib laguma helin gobonimada ee nafbaa loo huraye

14.Nadarkii allaa u furan ruuxii niyadda ka aamina

15.Daris aan wada nagaaniyo hadey nabadii jareen

16. Hadey soo nagaadsadeen naaskeeda maandeeq

17.Wallaaney nuugeyn intuu wiil Soomaali noolyahaye

18.Waa in aaney nasan oo ay naxdinna soo jeedaane

19. Nabarro culusiyo madfac waa in lagu nusbaaraaye

20.Nasri waa inaaney helin nabaddey takooreene

21.Naaguhu waa inay shiidaan oo nugul ka dooxaane

22.Niggax waa in lagu dabraa sii nidqaan caruuruhuye

23.Dariiqyada waa inaad isugu nabtaan rasaas uga nixisaane

24. Naar iyo giraanta waa inaad naxar u karisaane

25.Naadirran waa iney noqdaan gurmad isku nuuxsada’e

26.Waa inay nacaan baddiyo dhulkey soo naqeysteene

27.Nidar baa inoo xiran inay nabar la tiicaane

28.Ha nashleeyo dhiiggu taniyo intey noo-da gabayaan

29.Naleskii addis waa in uu naxdin la selelaaye

30. Ha naa-naabo sidii ruux nolosho eersadaye

31.Ha nasteeyo been iyo naxli wuxuu rabo’e

32.Ha naawilo Buush inuu nooga hiiliyo’e

33.Ha warnaado Naxashkoodu taniyo biyaha niilkaaye

34.Xaajada ninkii mudnaa waa inuu nacame taliyaaye

35.Nusqaantii ha tuureen Oramadu loo nisbeyn jiraye

36.Niyaddii gobonimo-doon nalal haw siraadeene

37.Numbar iyagaa badane najax waa inay hariyaane

38.Nahaabka Meles haw qabteen naf wuxuu jaraye

39.Nasab uma lahee Tigreey waa in laga nadiifshaaye

40.Niisadihii iyo gododkoodii waa iney dib u noqotaaye

41.Naruuray sugayaan shacabkii iyo nasriga eebbahaye

42.Naxariis hogaamiye leh oo beesha nabadeeya

43.Naaquska soo afmeera dalkaan daqarku naafeeyey

44.Ku nageeya Caddaalad iyo nolol barwaaqaade

45.Nidaam aan sokeyn laheyn waa in nudubka loo taago

46.Ha dageen nimciyo baraare jiilka naga danbeeyaaye

47.Nin xun iyo dagaal-ooge ha la xiro duul nasaqeedka

48.Nacaska jidka galayiyo tuugada waa in niggax la tooxaaye 

49.Nirgaheenu carrigey daaqi jireen waa in lagu nageeyaaye

50.Nageyliyo Jigjiga waa inaan nabad ku joognaaye

 Axmed Cawaale.